Нэмэгдсэн: 2020-01-29 02:34:00

Санхүүгийн хориг арга хэмжээг хэрэгжүүлэх олон улсын байгууллага /ФАТФ/-аас 2019 оны 10 дугаар сарын 18-ны өдрийн ээлжит хурлаар Монгол Улсыг мөнгө угаах болон терроризмыг санхүүжүүлэхтэй тэмцэх чиглэлээр стратегийн дутагдалтай орнуудын жагсаалтад оруулж, хугацаатай үүрэг даалгаврыг 4 чиглэлийн хүрээнд өгсөн.

Энэ үүрэг даалгаврыг хэрэгжүүлэх ажлын хүрээнд Монгол Улсын Их Хурлын 2020 оны 01 дүгээр сарын 17-ны өдрийн нэгдсэн чуулганы хуралдаанаар Санхүүгийн зохицуулах хорооны эрх зүйн байдлын тухай хууль болон Аж ахуйн үйл ажиллагааны тусгай зөвшөөрлийн тухай хуульд нэмэлт оруулж, үнэт металл, үнэт чулууны, эсхүл тэдгээрээр хийсэн эдлэлийн арилжаа эрхлэгчийн болон үл хөдлөх эд хөрөнгө зуучлалын үйл ажиллагаа эрхлэх тусгай зөвшөөрөл олгох, зохицуулах, хяналт тавих үүргийг Санхүүгийн зохицуулах хороо хэрэгжүүлэхээр хуульчлагдлаа.

Дээрх хуулийн шинэ зохицуулалтын хүрээнд үнэт металл, үнэт чулууны, эсхүл тэдгээрээр хийсэн эдлэлийн арилжаа эрхлэгчийн болон үл хөдлөх эд хөрөнгө зуучлалын байгууллагын үйл ажиллагаа эрхлэх тусгай зөвшөөрлийн нөхцөл, шаардлагыг Санхүүгийн зохицуулах хорооноос тогтоож, 2020 оны нэгдүгээр улиралд багтаан холбогдох зөвшөөрөл хүссэн баримт материалыг хүлээж авах, шаардлага хангасан нөхцөлд олгох ажлыг эхлүүлэх болсныг мэдэгдэж байна.

Цаашид энэ төрлийн үйл ажиллагааг зөвхөн Санхүүгийн зохицуулах хорооноос олгосон холбогдох тусгай зөвшөөрлийн хүрээнд эрхлэх боломжтой гэдгийг үнэт металл, үнэт чулууны, эсхүл тэдгээрээр хийсэн эдлэлийн арилжаа эрхлэгч болон үл хөдлөх эд хөрөнгө зуучлалын үйл ажиллагааг эрхэлж буй этгээдүүд болон тэдгээрийн үйлчлүүлэгчид анхааруулж байна.

САНХҮҮГИЙН ЗОХИЦУУЛАХ ХОРОО