Нэмэгдсэн: 2018-09-07 09:26:00

Санхүүгийн зохицуулах хорооны дарга С.Даваасүрэн ОХУ-ын Сочи хотноо чуулж буй Дэлхийн бодлогын форумын “Санхүүгийн хүртээмжийн инноваци” хуралдаанд чиглүүлэх илтгэл тавьж, санхүүгийн зах зээлийн хөгжил нь инновацийг нэмэгдүүлэх гол хүчин зүйл бөгөөд инноваци мөн санхүүгийн зах зээлийн хөгжилд чухал үүрэгтэйг онцлон өгүүллээ. Тэрээр, санхүүгийн зах зээлд бий болж буй технологид суурилсан инноваци болох финтекийн бүтээгдэхүүн, үйлчилгээ, компаниудад хийгдэж буй хөрөнгө оруулалт сүүлийн жилүүдэд маш хурдтай өсөж, 2018 оны эхний хагас жилийн байдлаар финтект хийгдсэн хөрөнгө оруулалт дэлхийн хэмжээнд 38.9 тэрбум долларт хүрээд байгааг дурдаж, Монгол Улсын санхүүгийн зах зээлд шинээр гарч ирж буй финтекийн бүтээгдэхүүнээр жишээ болгон ярив. Хуралд оролцогчид түүнийг Монгол Улсад санхүүгийн эрх, хэрэглээний талаарх жендерийн тэгш байдал, түүн дотор уламжлалт нүүдлийн ахуй, соёлын нөлөөгөөр эмэгтэйчүүдийн оролцоо давуу байдаг тухай тайлбарыг ихээхэн талархалтай хүлээн авч, алга ташин баяр хүргэж байлаа.

Дэлхийн банкны CGAP (the Consultative Group to Assist the Poor) сүлжээний төлөөлөгч, доктор Стефан Стачений удирдан явуулсан тус хуралдаанд доктор С.Даваасүрэнгийн хамт ОХУ-ын Төв банкны Санхүүгийн зах зээлийн стратегийн газрын захирал Владимир Таможников, Кенийн Хадгаламж, зээлийн хоршооны зохицуулах газар (SASRA)-ын гүйцэтгэх захирал Жон Муака, Германы “Фидор солюшн” компанийн гүйцэтгэх захирал Маттиас Крөнер, Ботсванийн “Летшего групп” компанийн борлуулалтын бүлгийн ахлагч Жэймс Уэйнэйна нар панелистаар ажиллав. Санхүүгийн салбарын хөгжлийн чиг хандлага гэж болох дижитал санхүү болон технологид суурилсан санхүүгийн үйлчилгээ, тэдгээрийн зохицуулалтын талаар панелистууд тус тусын сорилт туршлага, ололт амжилт болон нөхцөл байдалд суурилан ярьж, инновацийг өргөжүүлэхэд баримталж буй бодлого, үйл ажиллагаагаа танилцуулсан юм.  

Дэлхийн бодлогын форумын үндсэн үйл ажиллагааны нээлтийн ёслол мөн өчигдөр болсон бөгөөд зохион байгуулагч ОХУ-ын Төв банк СХН-ийн хүндэт зочдыг уламжлалынхаа дагуу талх, давсаараа дайлсан юм. Нээлтийн хуралдаан болон СХН-ийн сүүлийн 10 жилд дэлхий дахины санхүүгийн хүртээмжийн байдалд үзүүлсэн нөлөө, ОХУ-ын санхүүгийн хүртээмжийн байдал, зэрэг хэлэлцүүлгүүдээр Дэлхийн бодлогын форумын төлөөлөгчид инноваци, хүртээмж, нөлөөлөл гэсэн үндсэн сэдвүүдийг нарийсган ярилцаж, улмаар блокчэйн технологи, дижитал давуу байдал, финтек болон хүртээмжтэй даатгал, олон нийтийн санхүүгийн мэдлэг, боловсролыг нэмэгдүүлэх зэрэг салбар хуралдаануудаар гүнзгийрүүлэн ярилцлаа.