Нэмэгдсэн: 2018-06-02 06:21:00

Монголбанк, Санхүүгийн зохицуулах хороо болон банк, санхүүгийн салбарын төр, хувийн хэвшлийн байгууллагууд хамтран энэ оны нэгдүгээр сарын 2-ноос эхлэн орон даяар явуулсан “Санхүүгийн хэрэглэгчийг хамгаалах аян” өнөөдөр өндөрлөлөө. Д.Сүхбаатарын талбайд болсон аяны хаалтын ажиллагаанд Хорооны дарга С.Даваасүрэн үг хэлж, аяны хугацаанд банкнаас бусад санхүүгийн салбарт хэрэглэгчийг хамгаалах болон хэрэглэгч, харилцагчдын санхүүгийн мэдлэг, мэдээллийг дээшлүүлэх чиглэлээр явуулсан үйл ажиллагааг товч танилцуулж, аянд идэвхтэй оролцсон нийт байгууллага, санхүүгийн салбарын ажилтан, албан хаагчдад талархал дэвшүүлэв.

Аяныг Монгол Улсад анх удаа санаачлан, хэрэгжүүлэх ажлыг удирдан явуулсан Монголбанк энэ үеэр хэрэглэгчид, олон нийтийн санхүүгийн суурь мэдлэгийг дээшлүүлэх талаар явуулсан Хорооны үйл ажиллагааг үнэлэн талархлын цом гардууллаа.

 

“САНХҮҮГИЙН ХЭРЭГЛЭГЧИЙГ ХАМГААЛАХ АЯН”-Ы ХААЛТЫН АЖИЛЛАГААНД САНХҮҮГИЙН ЗОХИЦУУЛАХ ХОРООНЫ ДАРГА, ДОКТОР С.ДАВААСҮРЭНГИЙН ХЭЛСЭН ҮГ

 

Эрхэм хүндэт Та бүхний энэ өдрийн амгаланг эрэн мэндчилье.

Санхүүгийн тогтвортой байдал нь иргэдээс санхүүгийн зах зээлд итгэх итгэлийг бататгах, бүх нийтийн санхүүгийн мэдлэгийг дээшлүүлэх, санхүүгийн зах зээлд оролцогчдын хууль ёсны эрх ашгийг хамгаалах, санхүүгийн гэмт хэрэг, зөрчлийн гаралтыг багасгах гэсэн хоорондоо нягт уялдаа бүхий зорилтуудыг хэрхэн хангаж байгаагаар тодорхойлогддог.

Санхүүгийн тогтвортой байдлыг хангах, санхүүгийн зах зээлийг хөгжүүлэхэд иргэдийн санхүүгийн суурь мэдлэгийг дээшлүүлэх асуудал ач холбогдол өндөртэй. Ялангуяа санхүүгийн зах зээл өргөжин тэлж, дэвшилтэт технологи олноор нэвтэрснээр санхүүгийн бүтээгдэхүүн, үйлчилгээний төрөл төрөлжин олширсоор байгаа өнөө үед иргэн бүр, айл өрх бүр санхүүгийн хувьд тогтвортой байх нь улс орны санхүүгийн тогтвортой байдлын үндэс юм.

Иймд Санхүүгийн зохицуулах хороо, Монголбанк, Сангийн яам, Боловсрол, соёл, шинжлэх ухааны яамтай хамтран баталсан “Олон нийтийн санхүүгийн суурь мэдлэгийг дээшлүүлэх хөтөлбөр”-ийн хүрээнд хэрэгжүүлсэн Санхүүгийн хэрэглэгчийг хамгаалах аян нийт таван сарын хугацаанд үр бүтээлтэй өрнөж, харилцан уялдаа бүхий цогц үйл ажиллагааг хамарсан нь өнөөдөр өндөрлөж байна.

Энэхүү аян нь санхүүгийн хэрэглэгчийг хамгаалах чиглэлээр Монгол Улсад анх удаа хэрэгжиж буйгаараа онцлогтой төдийгүй төрийн болон төрийн бус байгууллагуудыг хамруулсан олон талт арга хэмжээ байлаа. Аяны хүрээнд иргэдийн санхүүгийн салбарт итгэх итгэлийг нэмэгдүүлэх, тэднийг зөвлөгөө мэдээллээр хангах, олон нийтийн санхүүгийн боловсролыг дээшлүүлэх зорилтыг хэрэгжүүлэх нэгэн үе шат байлаа. Яг энэ цаг мөчид Санхүүгийн зохицуулах хорооны ажлын хэсэг хөдөө, орон нутагт ажиллаж байна. Иргэдийн санхүүгийн тогтвортой байдал нь санхүүгийн зах зээлийн талаар мэдээ, мэдээлэл, ойлголттой байхтай, мэдлэгтэй байхтай салшгүй холбоотой юм.

Өнгөрсөн таван сарын хугацаанд санхүүгийн зах зээлийн талаар нэгдсэн, харилцан уялдаа бүхий мэдээллийг олон нийтэд хүргэж байгаагаараа ихээхэн ач холбогдолтой. Аяны хүрээнд иргэд өөрийн хэрэгцээт мэдээ, мэдээллийг олж авснаар санхүүгийн буруу шийдвэр гаргаж эрсдэлд орох, энэ нь санхүүгийн салбарт сөрөг нөлөөлөл үүсгэх эрсдэлийг бууруулах, санхүүгийн хэрэглэгчийн хандлагыг сайжруулахад бодит үр дүнгээ өгнө гэдэгт гүнээ итгэж байна.

Санхүүгийн зохицуулах хороо мэргэжлийн судалгааны байгууллагатай хамтран зах зээлийн төлөв байдал, иргэд, хөрөнгө оруулагчид болон зах зээлийн тоглогчдын хүлээлт ямар байгаа зэргийг тандан судалж, иргэдийн санхүүгийн зах зээлд итгэх итгэлийн судалгааг тэднээс түүвэрлэн мэдээлэл авах аргаар хийж байна. Энэ хүрээнд санхүүгийн салбарт хэрэгжүүлэх төрийн зохицуулалтыг төлөвлөхөд шаардлагатай бодит мэдээллийг цуглуулах, нэгтгэн дүгнэх, бодлогын хэрэгжилтэд итгэх иргэдийн итгэл, зах зээлийн талаарх мэдлэг, зах зээлийн оролцоонд гарч буй өөрчлөлтийг тандах зорилгоор явуулж буй судалгааг улсын хэмжээнд хийлээ.

Цаашлаад иргэдийн санхүүгийн мэдлэг сайжрах нь эдийн засгийн бодит өсөлт болон ядуурлыг бууруулахад чухал нөлөөтэйгөөс гадна санхүүгийн хэрэглэгч, санхүүгийн үйлчилгээ үзүүлэгч, зохицуулагч байгууллагууд зэрэг зах зээлд оролцогч талуудад ашиг тусаа өгөх юм.

Ингээд санхүүгийн зах зээлийг хөгжүүлэхэд сэтгэл зүрх, хүч хөдөлмөрөө дайчлан ажиллаж буй салбарын нийт ажилтнууд, гадаад дотоодын хамтрагч, дэмжигч түнш байгууллагууд болон санхүүгийн хэрэглэгчиддээ дахин талархал илэрхийлж, Та бүхэнд сайн бүхнийг хүсэн ерөөе.

 

2018.06.02

СҮХБААТАРЫН ТАЛБАЙ