Нэмэгдсэн: 2018-05-11 12:59:00

Даатгалын үйл ажиллагаа эрхэлдэг бизнес эрхлэгчдийн эвлэлдэн нэгддэг Монголын даатгагчдын холбоо зах зээлийн олон талын оролцогч нарыг нэгтгэх зорилгоор албан ёсны нэрээ Монголын даатгалын холбоо болгон өөрчилсөн байна. Тус Холбооны удирдлагын багийн төлөөллийг Санхүүгийн зохицуулах хорооны Даатгалын болон Хяналт шалгалт, зохицуулалтын газрын удирдлагууд өнөөдөр хүлээн авч уулзлаа.

Холбооны удирдлагууд үйл ажиллагааныхаа шинэчлэлт, өөрчлөлтийн талаар болон банкнаас бусад санхүүгийн салбарын өсөлтийг хангах, дэвшилтэт технологид суурилан санхүүгийн хүртээмжийг дээшлүүлэх, хууль эрх зүйн орчныг сайжруулах асуудлаар ажил хэрэгч санал дэвшүүлж ярилцав. Мөн хүний амь нас, эрүүл мэндийг үнэлэх аргачлал бий болгох, даатгалын үйл ажиллагааг даатгалын зуучлагчийн зохицуулалтаар дэмжих, сургагч багшийг бэлтгэх, нөхөн төлбөрийн стандартыг боловсруулах, мэдээллийн нэгдсэн санг бий болгох, мөнгө угаах терроризмтой тэмцэх, актуарчдийг бэлтгэх, даатгалын зах зээлийг хөгжүүлэх зэрэг өргөн хүрээнд хамтран ажиллах байр сууриа танилцуулсан юм.

Санхүүгийн зохицуулах хорооны Даатгалын газраас Холбооны удирдлагуудын тавьж буй асуудал, санал шийдлийг судалж, хамтран ажиллахаа илэрхийлээд, дээрх чиглэлүүдээр нарийвчилсан төлөвлөгөө гарган ажиллахаар санал нэгдлээ.