Нэмэгдсэн: 2018-04-26 12:33:00

Санхүүгийн зохицуулах хороо иргэд, олон нийтийн санхүүгийн суурь мэдлэгийг дээшлүүлэх зорилгоор уран илтгэлийн “FRC Plus” цуврал уралдааныг санаачлан, эхлүүлээд байгаа билээ.

Мэргэжил, боловсрол, нас, хүйс харгалзахгүй хүссэн хэн бүхэн оролцох боломжтойгоор зохион байгуулж буй уралдааны анхных “FRC Plus: Investment” буюу “Хөрөнгө оруулалт” гэсэн ерөнхий сэдвийн хүрээнд болж байна. Үүн дотроо “Хөрөнгө оруулалтын эрсдэл ба өгөөж”, “Fintech-Хөгжил” гэсэн хоёр сэдвээс сонгож илтгэх боломжийг оролцогчдод олгож буй.

Гурван үе шаттай явагдаж байгаа “FRC Plus: Investment” уралдааны сүүлийн шатны шалгаруулалт маргааш буюу 2018.04.27-нд Монголбанкны хурлын танхимд болж, шилдэг илтгэгч тодорно. Өглөөний 10:00 цагт эхлэх шалгаруулалт нээлттэй буюу үзэж сонирхохыг хүссэн хүмүүст чөлөөтэй, үнэ төлбөргүй боловч Монголбанкны байр тусгай хамгаалалтад байдаг тулд үзэгчдийг урьдчилан бүртгэж байна. Иймд уран илтгэлийн шалгаруулалтыг үзэх сонирхолтой иргэд өнөөдөр өөрийн овог, нэр болон регистрийн дугаарыг frcplus@frc.mn хаягаар ирүүлэх буюу Хорооны 51-261893 дугаарын утсаар холбогдон бүртгүүлэх боломжтой. Бүртгүүлсэн үзэгч иргэний үнэмлэхтэйгээ ирж, шалгуулан Монголбанк руу нэвтэрнэ.

Уралдааны эцсийн шатанд зургаан оролцогч шалгаран үлдээд байгаа бөгөөд маргаашийн шалгаруулалтаар тэднээс гурав нь эхний байруудыг эзлэх юм.