Нэмэгдсэн: 2018-04-16 15:34:00

Санхүүгийн хүртээмжийн бодлого боловсруулагчдын дэлхийн сүлжээ болох Санхүүгийн хүртээмжийн нийгэмлэг (The Alliance for Financial Inclusion, AFI) үндсэн зургаан ажлын хэсгийн бүтцээр үйл ажиллагаа явуулдаг. Санхүүгийн зохицуулах хороо эдгээр ажлын хэсгүүдэд бүгдэд нь буюу Хэрэглэгчийн эрх ашиг ба зах зээлийн ёс зүй (Consumer Empowerment and Market Conduct, CEMC), Санхүүгийн хүртээмжийн стратеги (Financial Inclusion Strategy, FIS), Санхүүгийн хүртээмжийн өгөгдөл (Financial Inclusion Data, FID), Санхүүгийн хэрэглээний хэм хэмжээ, тэнцвэрт байдлын Олон улсын стандарт (Proportionate Application of Global Standards, GSP), Санхүүгийн цахим үйлчилгээ (Digital Financial Services, DFS), ЖДҮ-ийн санхүүжилт (SME Finance, SMEF) ажлын хэсгүүдэд ажиллаж байна.

Нийгэмлэгээс Йорданы Төв банктай хамтран тус Улсын Амман хотноо “Финтек-ийн асуудлаарх бодлогын чуулган” болон Санхүүгийн цахим үйлчилгээ (СЦҮ) ажлын хэсгийн 17, ЖДҮ-ийн санхүүжилт (ЖДҮС) ажлын хэсгийн 10 дахь уулзалтуудыг зохион байгууллаа. Бодлогын чуулган болон ажлын хэсгүүдийн уулзалтад Санхүүгийн зохицуулах хорооны Банк бус санхүүгийн байгууллагын болон Хадгаламж, зээлийн хоршооны газрын төлөөллүүд тус тусын чиглэлээр оролцож, технологид суурилсан санхүүгийн бүтээгдэхүүн, үйлчилгээний хөгжлийн хандлага, жижиг, дунд үйлдвэрийг санхүүжилтийн боломжуудын талаарх гишүүний орнуудын туршлагаас хуваалцав.

Бодлогын чуулганд Нийгэмлэгийн гишүүн 100 гаруй байгууллагын төлөөлөл оролцож, санхүүгийн үйлчилгээний чанарыг үр ашигтай болгох, хүртээмжийн цар хүрээг өргөжүүлэх финтек инновациудын шийдэл, зохицуулалтыг хэлэлцэв. Хэрэглэгчийн бүртгэл, мэдээллийг төгөлдөржүүлэх, нууцлал, хамгаалалтыг сайжруулах талаар хийж байгаа дэвшилтэт технологийг жишээлэн ярилцаж, ялангуяа нутаг оронгүй, дүрвэгч иргэдийн мэдээлэл, түүнийг таньж мэдэх хиймэл ой ухаан, тэдгээрийг санхүүгийн харилцаанд хүлээн зөвшөөрч хэрэглэх талаар бодит шийдлүүдийг эрэлхийлж ажиллах талаар чуулганы төлөөлөгчид санал нэгдсэн юм.

Ажлын хэсгүүдийн тус тусын болон хамтарсан уулзалтуудаар зарим улс орны цахим цахим төлбөр тооцооны журам, тэдгээрээр финтекийг хэрхэн журамлаж буй талаар ярилцаж, ажил хэрэгч хэлэлцүүлэг өрнүүлсэн юм. Үүний хүрээнд санхүүгийн бодлого зохицуулагч нарт тулгамддаг асуудлууд, зах зээлийн эрсдэлүүдийг шүүн ярилцаж, сорилт туршлагаасаа харилцан солилцов.

Уулзалт, чуулганаас ажлын хэсгийн гишүүд зохицуулах технологи буюу регтек-ийн гарц шийдлийг олоход чиглэсэн даалгавруудыг гүйцэтгэхээр болсон бөгөөд цахим санхүүгийн үйлчилгээ, хүртээмжийг нэмэгдүүлэхэд финтекийг ашиглахад шаардлагатай харилцагчийг таних механизмыг төгөлдөржүүлэх, аюулгүй байдлыг хангах, цахим санхүүгийн үйлчилгээний индикаторуудыг тодорхойлох зэрэг чиглэлээр нарийвчилсан ажлуудыг хийж гүйцэтгэхээр боллоо.