Нэмэгдсэн: 2017-12-22 16:27:00

Санхүүгийн зохицуулах хороо өнөөдөр 2017 оны үйл ажиллагааны тайлангийн хурлаа хийлээ. Хорооны дарга, доктор С.Даваасүрэн банкнаас бусад санхүүгийн салбарт хэрэгжүүлсэн бодлогын болон хяналт, зохицуулалтын үйл ажиллагаа, ахиц өөрчлөлт болон Ажлын албаны хамт олны ажлын үр дүнгийн талаар дэлгэрэнгүй тайлан тавив.

Хороо 2017 онд 16 удаагийн хуралдаан хийж нийт 235 асуудал хэлэлцэн шийдвэрлэсний дээр зохицуулалттай салбаруудад оролцогчид, бизнес эрхлэгчдийг чадавхжуулах, идэвхжүүлэхэд чиглэсэн олон ажлыг амжилттай хэрэгжүүлсэн байна. Энэ онд хөрөнгийн зах зээлийн нийт үнэлгээ бодит агуулгаараа өсөн 2.1 их наяд төгрөг болж, анхны хувийн бирж арилжаагаа амжилттай эхэлж, ХААБ дээр анхны үүсмэл санхүүгийн хэрэгсэл арилжаалагдаж эхэлсний дээр энэ онд зах зээлд шинээр гаргасан бүх IPO, компанийн бонд өндөр амжилттай арилжаалагдсан зэрэг эерэг үр дүнгүүд гарлаа. Даатгалын салбарын нийт хөрөнгө 250 тэрбумыг давж, хураамжийн орлого 29 хувиар нэмэгдсэн бол банк бус санхүүгийн салбарын нийт хөрөнгө 1.0 их наядад шахаж, зээлийн сарын жигнэсэн дундаж хүү 3.4 хувь болж буурчээ. Хадгаламж зээлийн хоршоодын үйл ажиллагаа тогтворжин, нийт хөрөнгийн хэмжээ 31 хувиар өсөж, төвлөрүүлсэн хадгаламжийн хэмжээ 100.0 тэрбумд дөхөөд байна.

Энэ мэт нааштай үзүүлэлтүүд эдийн засгийн өсөлт мэдэгдэхүйц сайжирч, бизнесийн үйл ажиллагаа идэвхжиж байгаагаас шалтгаалж буй ч Хорооны хамт олны хүчин чармайлт тодорхой хэмжээнд нөлөөлсөн гэж дүгнэж буйгаа Хорооны дарга С.Даваасүрэн онцлон дурдаж, нийт албан хаагч, ажилтнуудад амжилт хүслээ.

Тайлангийн хурлын үеэр 2017 онд эрхэлсэн ажлаа идэвх, санаачилгатай гүйцэтгэж, бодитой үр дүн гаргасан Үнэт цаасны газар Ахлах референт Ц.Цэрэнтогтох, Ж.Эрдэмзаяа, Банк бус санхүүгийн байгууллагын газрын орлогч дарга Б.Итгэлсүрэн, Хяналт шалгалт, зохицуулалтын газрын орлогч дарга Б.Долгорсүрэн, ахлах референт П.Ууганбаяр, Судалгаа, эрсдэлийн шинжилгээний хэлтсийн дарга Н.Хүдэрчулуун, Ахлах мэргэжилтэн Б.Наранжаргал, Даатгалын газрын ахлах референт З.Батболд, Хадгаламж, зээлийн хоршооны газрын ахлах референт С.Тулгаа, Гадаад харилцаа, хамтын ажиллагааны газрын ахлах мэргэжилтэн Ц.Мандаргуа, Захиргаа удирдлагын газрын мэргэжилтэн Х.Насанболд нарын 11 албан хаагчийг байгууллагын “Шилдэг ажилтан”-аар тодруулан шагналаа.