Нэмэгдсэн: 2017-11-24 09:00:00

Монгол хүн бүхний, айл өрх, ажил үйл бүхний чанарын манаанд зогсоо даатгалын салбарын үе үеийн зүтгэлтнүүд, бизнес эрхлэгчид, ажилтан, албан хаагчдад Монгол Улсын Даатгалын өдрийг тохиолдуулан чин сэтгэлийн мэндчилгээ дэвшүүлж, ажлын амжилт, аз жаргалыг хүсэн ерөөе.

Монголын санхүүгийн салбарын чухал нэгэн тулгуур болсон Даатгалын зах зээл 83 жилийн түүхэн замналыг туулан хөгжихдөө өрнөл идэвхжил, өөрчлөлт шинэчлэлтийн өгсөж, уруудсан даваа нугачааг гэтлэн давсан арвин туршлагатай. Сүүлийн 10 жилд тус салбарын нийт хөрөнгийн хэмжээ тогтмол өсөж, өнөөдрийн байдлаар 251.7 тэрбум төгрөгт хүрснээр эрсдэл даах чадварын хувьд 2007 оныхоос даруй 9.0 дахин нэмэгдсэн үзүүлэлт юм.

Хэдийгээр үндсэн үзүүлэлтүүд сүүлийн жилүүдэд өссөөр байгаа ч хөгжлийн гол хэмжүүр болох даатгалын гүнзгийрэлт, нягтралын үзүүлэлтүүд нь бусад орнуудтай харьцуулахад бага байна. Энэ нь манай даатгалын салбарт зах зээлийн багтаамж хангалттай байгааг илтгэх бөгөөд шинэ төрлийн бүтээгдэхүүн, үйлчилгээ нэвтрүүлэх, хүртээмжийг нэмэгдүүлэх боломж бийг харуулж буй юм.

Санхүүгийн зохицуулах хороо цаашид даатгалын бүтээгдэхүүн, үйлчилгээг хэрэглэгч даатгуулагчдад улам ойртон хүрсэн, хүртээмжтэй, хялбар, хямд арга ажиллагаанд шилжүүлэн хөгжүүлэх бодлого баримтлан, энэ чиглэлээр зохицуулалтын механизмуудыг шинэчлэх, боловсронгуй болгохоор ажиллаж байна. Зах зээлд оролцогчид, мэргэжилтнүүд, төрийн зохицуулагч та бидний хамтын хүчин чармайлтаар Монгол Улсад даатгуулах соёл түгэн дэлгэрч, амьдралын чанар дээшлэн, хүн ардын сайн сайхан цогцлон бүрдэнэ гэдэгт огтхон ч эргэлзэхгүй байна.

Монголын даатгагчдын олон жилийн хөдөлмөр зүтгэлийн үр шим бадран, өнөө, ирээдүйн зорилго үйл бүтэн батжиж, сайн сайхан дэлгэрэх болтугай.

 

САНХҮҮГИЙН ЗОХИЦУУЛАХ ХОРООНЫ ДАРГА  С.ДАВААСҮРЭН