Нэмэгдсэн: 2017-11-10 15:02:00

Санхүүгийн зохицуулах хороо, Үндэсний аудитын газар, Чингэлтэй дүүргийн Онцгой байдлын хэлтэс, Гал түймэр унтраах, аврах 10 дугаар анги, Төрийн ордны Онцгой байдлын байцаагч нар хамтран “Гал түймрийн ослын үед авч хэрэгжүүлэх практик сургуулилт”-ыг Засгийн Газрын IV байранд зохион байгууллаа.

Сургуулилтын үеэр Санхүүгийн зохицуулах хорооны гамшгаас урьдчилан сэргийлэх орон тооны бус штаб, мэргэжлийн ангийн бүрэлдэхүүний 23 албан хаагч долоон бүлэгт хуваагдаж гал түймрийн үед нийт албан хаагчдыг аюулгүй гаргах шуурхай арга хэмжээ зохион байгуулж ажиллав. Энэ ажиллагааны хүрээнд “Гал түймэр унтраах, аврах 10 дугаар анги”-иас тусгайлан бэлтгэж асаасан галыг багаж хэрэгсэл ашиглан унтраах практик сургуулилтыг сайн дурын албан хаагчдыг оролцуулан хийж, гал унтраах ажиллагааг биечлэн гүйцэтгүүллээ.

Түймрийн үед албан хаагчид түгшүүрийн дохиогоор ажлын байрыг түр орхих, бүлэгт хуваагдаж аюулгүй ажиллагааг хангах талаар мэдлэг, мэдээлэл авч, түүнийгээ практик сургуулилтаар баталгаажуулан дадлагажсан ач холбогдолтой арга хэмжээ болов.